ShQO-da qatty jel úılerdiń shatyryn ushyryp, aǵashtardy qulatty
ÓSKEMEN. KAZINFORM – Shyǵys Qazaqstan oblysynyń birneshe qala, aýdanynda daýyl soqty.
Qatty jel Rıdder qalasynyń turǵyndaryna eń kóp zalal keltirdi. Elektr jelilerin zaqymdap, turǵyn úıler men basqa da ǵımarattardyń shatyrlaryn ushyryp, aǵashtardy qulatty.
Barlyǵy 1 237 úı jaryqsyz qalǵan. Qazir qalpyna keltirý jumystary júrgizilip jatyr. Búgin túnge deıin jaryq qaıta qosylady dep josparlanǵan.
ShQO TJD baspasóz qyzmetiniń málimetinshe, halyq arasynda zardap shekken eshkim joq.
— Jedel áreket etý shtaby quryldy. Barlyq kommýnaldyq jáne jedel qyzmetter táýlik boıy jumys isteıdi. Azamattardyń ótinishteri keshiktirilmeı qarastyrylýda, - dep habarlady oblys ákimdiginen.
Ulan aýdanynda daýyl áleýmettik nysandarǵa zaqym keltirdi. Bozanbaı aýylyndaǵy «Aıgólek» balabaqshasy qosymsha ǵımaratynyń 70 sharshy metr syrtqy qaptamasy búlindi. Qasym Qaısenov kentinde Balalar shyǵarmashylyq úıiniń fýtbol alańynyń 2 300 sharshy metr jasandy jabyndysy zaqymdandy.
Óskemende qatty jel «Halıfa Altaı» meshitiniń kúmbezin syndyrdy. Qalpyna keltirý jumystaryna metsenattar men kásipkerler qoldaý kórsetti. Qaladaǵy basqa jerlerde de jeldiń zardaptary joıylyp jatyr: qulaǵan aǵashtar jınalyp, elektr jelileri men aqaýlar jóndelýde. Esenberlın kóshesinde baǵdarsham ýaqytsha jumys istemeı, qozǵalysty jol saqshylary rettep turdy.
Shemonaıha qalasynyń 3-shi shaǵyn aýdanynda besqabatty turǵyn úıdiń shatyrynyń bir bóligin jel ushyryp áketti. Zaqymdanǵan aýmaq 300 sharshy metrdi qurady. TJD málimetine súıensek, ǵımarat bir jyl buryn ǵana jóndelgen. Oqıǵa ornynda qutqarýshylar men ákimdik qyzmetkerleri jumys istep jatyr.
Eske salsaq, buǵan deıin Almatyny shańdy daýyl basyp qalǵany habarlanǵan.