ShQO-da qatty jel 19 úıdiń shatyryn qıratty
ÓSKEMEN. KAZINFORM – Shyǵys Qazaqstan oblysy Glýbokoe aýdanynda qatty jel 19 úıdiń shatyryn qıratty.
Aýdan ákimdiginiń málimetine súıensek, Cheremshanka, Bystrýha jáne Maloýbınka aýyldyq okrýgterinde qatty jel soǵyp, úılerge zaqym keltirdi.
Barlyǵy 19 jer úıdiń shatyry qırady. Sondaı-aq Bystrýha aýylyndaǵy mádenıet úıiniń shatyry qırap qalǵan.
«Arnaıy qurylǵan komıssııa múshelerimen birge jelden zardap shekken aýyldarǵa baryp, zaqymdalǵan nysandardy qarap, turǵyndarmen sóılestim. Daýyldyń saldaryn joıý boıynsha jumys jospary ázirlengen. Mádenıet úıin jóndeý úshin jergilikti bıýdjetten qajetti qarajat bólinedi. Al úıleri búlingen azamattarǵa Glýbokoe aýdanynyń jumyspen qamtý jáne áleýmettik baǵdarlamalar bólimi arqyly materıaldyq kómek kórsetemiz», - deıdi aýdan ákimi Eldar Tumashınov.
