ShQO-da kassadan 10 mln teńgeden astam qarjy jymqyrǵan esepshi sottaldy
ÓSKEMEN. KAZINFORM - Shyǵys Qazaqstan oblysy Zaısan aýdanynda aqsha jymqyrǵan esepshige qatysty sot isi qaraldy.
Belgili bolǵandaı, JShS-da azyq-túlik qoımasynda esepshi-kassır bolyp jumys istegen áıel birneshe aıda kompanııa kassasynan jalpy somasy 10 844 549 teńgeni jymqyrǵan.
Shyǵys Qazaqstan oblystyq soty baspasóz qyzmetiniń málimetine súıensek, sot barysynda aıyptalýshy kinásin moıyndap, istegen isine ókinetinin jetkizdi. Áıeldiń kámeletke tolmaǵan balalarynyń bolýy jazany jeńildetetin mán-jaı retinde tanyldy.
- Sot úkimimen sottalýshy QR Qylmystyq Kodeksiniń 189-babymen (senip tapsyrylǵan bóten múlikti iri mólsherde ıelený nemese ysyrap etý) kináli dep tanyldy. Oǵan múlkin tárkileı otyryp, 3 jyl 6 aı merzimge bas bostandyǵyn shekteý jazasy taǵaıyndaldy. Sonymen qatar materıaldyq shyǵyndy óndirý týraly azamattyq talap qanaǵattandyryldy. Úkim áli zańdy kúshine engen joq, - delingen aqparatta.
Eske salsaq, osyǵan deıin ArtSport baǵdarlamasy aıasynda 1,4 mln teńge jymqyrǵan kásipker sottalǵanyn jazǵan bolatynbyz.