ShQO-da kásiporyndarda jaraqat alǵandar sany 24 paıyz artty
ÓSKEMEN. KAZINFORM — Shyǵys Qazaqstan oblysyndaǵy óndiris oryndarynda jaraqat alǵandar sany 24 paıyzǵa artyp otyr.
Bul týraly Shyǵys Qazaqstan oblysy boıynsha eńbek ınspektsııasy departamentinen málim etti.
— Jyl basynan beri bizge 1 440 ótinish kelip tústi. Onyń 95,7 paıyzy eńbek qatynastaryna qatysty. Osy kezeńde 211 tekserý júrgizilip, 261 zańbuzýshylyq anyqtaldy. Berilgen 205 nusqamanyń nátıjesinde zańbuzýshylyqtardyń 80 paıyzy joıyldy, — deıdi departament basshysy Baqytbek Qızatov.
Sonymen qatar óńirde óndiris barysynda jaraqat alǵandar sany byltyrǵy osy kezeńmen salystyrǵanda 24 paıyz ósti. Alty aı ishinde 52 jazataıym oqıǵa tirkelip, 62 adam zardap shekken. Onyń ishinde 4 adam qaza bolyp, 36 adam aýyr jaraqat alǵan.
Jazataıym oqıǵalardyń basym bóligi taý-ken metallýrgııasy men qurylys salalarynda bolǵan.
— Eńbek qaýipsizdigin arttyrý maqsatynda oblystaǵy 124 kásiporyn joǵary táýekel aımaǵynan shyǵaryldy. Búginde 45 kásiporyn halyqaralyq «Vision Zero» tujyrymdamasyn engizip, qaýipsiz eńbek mádenıetin qalyptastyrýǵa úles qosyp otyr, — deıdi Baqytbek Qızatov.
Eske salsaq, osyǵan deıin Shymkentte óndiristegi jazataıym oqıǵalardan 3 adam qaza taýyp, 14-i aýyr jaraqattanǵany habarlanǵan.
