ShQO-da kásipkerlerge 140-qa jýyq zańsyz tekserý júrgizilgen
ÓSKEMEN. KAZINFORM — Shyǵys Qazaqstan oblysynda bir jyl ishinde kásipkerlerge 138 zańsyz tekserý júrgizilgeni anyqtaldy. Tekserý qorytyndylary boıynsha 41 laýazymdy tulǵa jaýapqa tartyldy.
Bıznes ókilderine júrgizilgen tekserýdiń zańdy nemese zańsyz ekenin qalaı ajyratýǵa bolatyny ShQO-daǵy Kásipkerler palatasy janyndaǵy kásipkerlerdiń quqyqtaryn qorǵaý jáne sybaılas jemqorlyqqa qarsy is-qımyl keńesiniń otyrysynda talqylandy.
Kez kelgen tekseris bastalmas buryn ol Tekserýlerdi esepke alý men tirkeýdiń biryńǵaı júıesine tirkelýi tıis. Tekserý aktisi QR-kodpen rásimdeledi, onyń kómegimen kásipker baqylaýshy organ ókilderi áreketiniń zańdylyǵyn birden teksere alady. Eger tirkeý bolmasa, merzimder saqtalmasa nemese tekserý anonımdi shaǵym negizinde bastalsa — munyń bári ony zańsyz dep tanýǵa negiz bolady.
Máselen, 2025 jyly ShQO boıynsha barlyǵy 3 776 tekserý tirkelgen, bul ótken jylmen salystyrǵanda 73 paıyzǵa kóp. Alaıda jeke bızneske qatysty tekserýler sany 41 paıyzǵa qysqaryp, 2 111-di qurady. Soǵan qaramastan, júıeli zańbuzýshylyqtar da anyqtaldy. 28 tekserý tirkeýden ótkizilmeı toqtatylsa, 138-i zańsyz dep tanylǵan.
— Bıznes ókilderi baqylaý qaı jerde aıaqtalyp, quqyq buzýshylyq qaı jerde bastalatynyn naqty túsinýi tıis. Tirkeýsiz tekserý — bul baqylaý emes, qysym, — dedi keńes tóraǵasy Igor Shatskıı.
Monıtorıng qorytyndysy boıynsha zańbuzýshylyqtardy joıý týraly 9 usynys engizilip, 10 tártiptik jáne 23 ákimshilik is qozǵaldy. Jalpy sany 41 laýazymdy tulǵa jaýapqa tartyldy.
Eske salsaq, osyǵan deıin Shymkentte jarnama tólemin esepteý kásipkerler arasynda túsinbeýshilik týdyrǵany habarlanǵan.
