ShQO-da qasqyrlardyń malǵa shabýy jıilep ketti
ÓSKEMEN. QazAqparat – Shyǵys Qazaqstan oblysy Ulan aýdanynda túz taǵylarynyń malǵa shabý jıiledi. Osy oraıda aýdan ákimdigi men ShQO Tabıǵı resýrstar jáne tabıǵat paıdalanýdy retteý basqarmasy qasqyr sanyn retteý maqsatynda birqatar sharalardy qolǵa alǵan, dep habarlaıdy QazAqparat.
Sońǵy kúnderi Ulan aýdany, Joǵarǵy Taıynty aýylynda qasqyrlar malǵa tıip, eldiń úreıin qashyrǵan. Búgin ShQO óńirlik kommýnıkatsııalar qyzmetinde ótken baspasóz konferentsııasynda osyǵan baılanysty qandaı sharalar atqarylyp jatqany sóz etildi.
«17 aqpan kúni tikushaqtan arnaıy barlaý júrgizilip, Ulan aýdany Alǵabas aýyly mańynda - 6, Joǵarǵy Taıynty aýylynyń aýmaǵynda - tórt qasqyr atyldy. Aldaǵy ýaqytta bul maqsattaǵy jumystar jalǵasyn tappaq. Jalpy bıyl oblys boıynsha 510 qasqyr atýǵa ruqsat berilgen. Bul ótken jylǵydan 100 qasqyrǵa kóp», – deıdi basqarma basshysy Murat Qusaıynov.
Esterińizge sala ketsek, 2019 jyly Shyǵys Qazaqstan oblysy Tarbaǵataı aýdanynda bir úıdiń 70 qoıyn qasqyr tamaqtap ketken bolatyn.
