ShQO-da kásipkerlerdiń quqyǵyn buzǵan 104 laýazymdy tulǵa jazalandy
ÓSKEMEN. QazAqparat - Shyǵys Qazaqstan oblysynda bıznes ókilderiniń quqyqtaryn buzǵan 104 laýazymdy tulǵa jaýapqa tartyldy, dep habarlaıdy QazAqparat.
«Óńirimizde kásipkerlerdiń quqyǵyn qorǵaý maqsatynda birqatar sharalar qolǵa alynýda. Qandaı da bir zańsyzdyqtarǵa tap bolǵan kásip ıeleri bizge habarlasyp, shaǵym túsire alady. Mysaly, ótken jyly bıznes ókilderiniń quqyǵyn buzǵan 104 laýazymdy tulǵany jaýapqa tarttyq. Bul, 2018 jylmen salystyrǵanda 5 esege kóp», - deıdi ShQO Kásipkerler palatasynyń baspasóz hatshysy Hrıstına Doroshenko.
Onyń aıtýynsha, osy kórsetkish aımaq boıynsha kásipkerlerdiń quqyǵy jıi buzyla bastady degendi bildirmeıdi.
«Negizinen Kásipkerler palatasynyń jiti túsindirý jumystarynan keıin shaǵymdanýshylar arta tústi. Biz ár ótinishti tolyqqandy tekserýden ótkizemiz. Zańnyń buzylýy anyqtalǵan jaǵdaıda ǵana shara qoldanylady» - deıdi Hrıstına Doroshenko.
