ShQO-da qarjy pıramıdalaryna qatysty 500-ge jýyq silteme buǵattaldy
ÓSKEMEN. KAZINFORM - Shyǵys Qazaqstan oblysynda úsh qarjy pıramıdasy jabyldy.
Bul týraly ShQO boıynsha Ekonomıkalyq tergep-tekserý departamenti basshysynyń orynbasary Tımýr Muqanov málimdedi.
— Byltyr departament jumysynyń negizgi baǵyttarynyń biri ınternet keńistigin baqylaý boldy. Jyl boıy mamandar alaıaqtyq belgileri bar jáne qumar oıyndarǵa qatysty resýrstardy anyqtap, buǵattaýmen aınalysty. Atap aıtqanda, óńirde qarjy pıramıdalaryna qatysty 481 silteme, onlaın-kazıno jáne qumar oıyndarǵa baılanysty 591 silteme, zańsyz krıptoalmastyrý pýnktterine qatysty 121 silteme buǵattalǵan, - dedi ol.
Sonymen qatar azamattardy aldyn ala eskertýge erekshe nazar aýdarylyp keledi. Telegram messendjerinde «Baiqa, piramida» servısi iske qosylyp, onyń kómegimen paıdalanýshylar kúmándi jobalardy óz betinshe teksere alady. Ol úshin saıtqa nemese áleýmettik jelidegi paraqshaǵa siltemeni engizý jetkilikti.
— Keıingi bir jylda oblysta úsh qarjy pıramıdasynyń qyzmeti toqtatyldy. Sondaı-aq ınternet-resýrstardy buǵattaý jáne azamattardy qorǵaýǵa arnalǵan tsıfrlyq servısterdi engizý jumystary qatar júrgizilip jatyr, - dedi Tımýr Muqanov.
Jalpy, Qarjylyq monıtorıng agenttiginiń málimetinshe, 2021 jyldan beri Qazaqstanda 100-den astam qarjy pıramıdasy anyqtalyp, joıylǵan. Olardyń qatarynda ınvestıtsııalyq jobalar retinde búrkemelengen iri shemalar da bar.
Eske salsaq, osyǵan deıin qarjy pıramıdasyna qatysy bar kúdikti Grýzııadan elge jetkizilgeni habarlanǵan.
