ShQO-da qarjy pıramıdalary 250-den astam adamdy aldap, 400 mln teńge paıda kórgen
ÓSKEMEN. KAZINFORM - Shyǵys Qazaqstan oblysynda 6 qarjy pıramıdasynyń joly kesildi.
Shyǵys Qazaqstan oblysynda azamattardyń qarjylyq qaýipsizdigin qorǵaý maqsatynda alaıaqtyq shemalarǵa qarsy kúres kúsheıtilip jatyr. Bul týraly ShQO PD Kıberqylmyspen kúres basqarmasy bastyǵynyń orynbasary, polıtsııa podpolkovnıgi Bekjan Malǵajdarov málim etti.
- Sońǵy eki jylda oblys aýmaǵynda 6 qarjy pıramıdasynyń joly kesildi. Respýblıka aýmaǵynda «Chia Tai-Tianqing Pharmaceutical» jáne «Eolus» brendterimen jumys istegen eki qurylymdyq bólimsheniń basshylary sottaldy. Tergeý barysynda olardyń farmatsevtıkalyq kompanııa men sheteldik ınvestıtsııalyq jobalarǵa qarajat tartý syltaýymen halyqtan aqsha jınaǵany anyqtaldy. Sonyń saldarynan 250-den astam adam 400 mıllıon teńgeden astam shyǵynǵa batqan, - deıdi ol.
Sońǵy ýaqytta aımaqta ınternet-alaıaqtyq faktileri artyp keledi. Eń keń taraǵan túrlerine fıshıng, jalǵan ınternet-dúkender, jarnama platformalaryndaǵy jalǵan habarlandyrýlar, ınternet arqyly bopsalaý jatady.
- Alaıaqtardyń áreketterine tán negizgi belgilerine - olardyń birinshi bolyp baılanysqa shyǵýy, qarjy máselesine erekshe nazar aýdarýy, qupııa aqparatty talap etýi, emotsııalyq qysym kórsetýi jáne jyldam sheshim qabyldaýǵa ıtermeleýi jatady. Sol úshin kúmándi jobalarǵa aqsha salmaı, kompanııalardyń zańdy mártebesin tekserip, jeke málimetterdi jarııa etpeı jáne kúdik týyndaǵan jaǵdaıda bankke nemese quqyq qorǵaý organdaryna júginý qajet, - deıdi Bekjan Malǵajdarov.
Eske salsaq, osyǵan deıin qarjy pıramıdalary men zańsyz jarnamaǵa qarsy sharalar kúsheıtilgeni habarlanǵan.