ShQO-da qarýǵa qatysty zań talaptaryn buzǵan 50-ge jýyq adam jaýapqa tartyldy
ÓSKEMEN. KAZINFORM — Shyǵys Qazaqstan oblysynda qarýdy saqtaýǵa jáne tirkeýge qatysty zań talaptaryn buzǵan 45 adam ákimshilik jaýapkershilikke tartyldy.
Shyǵys Qazaqstan oblysy polıtsııa departamenti baspasóz qyzmetiniń málimetinshe, tártip saqshylary qarý aınalymy salasyndaǵy zańnama talaptarynyń saqtalýyn baqylaý maqsatynda reıd júrgizdi.
— Sonyń barysynda zańsyz aınalymnan 12 qarý, onyń ishinde tegis uńǵyly myltyqtardan bastap elektroshokty qurylǵylarǵa deıin tárkilendi. Mobıldi toptar azamattyq qarýdyń 8 myńnan astam ıesin turǵylyqty mekenjaıy boıynsha tekserip shyqty. Sondaı-aq Óskemen qalasynda krımınaldyq esepte «urlanǵan» retinde tirkelgen bir travmatıkalyq qarý anyqtaldy, — delingen aqparatta.
Tekserý nátıjesinde jalpy sany 45 ákimshilik quqyq buzýshylyq tirkeldi. Onyń 25-i qarýdy saqtaý qaǵıdalaryn buzýǵa qatysty bolsa, qalǵan 20 adam ony tirkeý tártibin saqtamaǵany úshin jaýapqa tartyldy.
Sondaı-aq qarý men oq-dárini zańsyz saqtaǵany jáne alyp júrgeni úshin toǵyzy azamat ákimshilik jaýapkershilikke tartylyp, eki adamǵa qatysty qylmystyq is qozǵaldy.
Eske salsaq, osyǵan deıin Jambyl oblysynda zańsyz qarý saqtaǵan eki baqtashyǵa aıyppul salynǵany habarlanǵan.
