ShQO-da qarýdy saqtaý erejesin buzǵan 20-ǵa jýyq adam jaýapqa tartyldy
ÓSKEMEN. KAZINFORM – Shyǵys Qazaqstan oblysynda tártip saqshylary atys qarýy bar adamdarǵa tekserý júrgizdi.
ShQO polıtsııa departamenti baspasóz qyzmetiniń málimetine súıensek, óńir aýmaǵynda 21-24 sáýir aralyǵynda «Qarý» jedel-aldyn alý sharasy júrgizildi.
– Sonyń barysynda polıtseıler azamattyq qarý ıelerine turǵylyqty jeri boıynsha aýqymdy tekserý júrgizdi. Jalpy sany 1 500-den astam adam qamtyldy. Júıeli túrde júrgiziletin profılaktıkalyq jumystarǵa qaramastan, reıdtik is-sharalar barysynda qarý saqtaý jáne qaıta tirkeý qaǵıdalaryn buzǵany úshin 18 adam ákimshilik jaýapkershilikke tartyldy, - delingen aqparatta.
Sondaı-aq quqyq qorǵaýshylar zańsyz aınalymnan 1 atys qarýyn tárkiledi. Osy rette, tártip saqshylary azamattardy qarý aınalymy salasyndaǵy zańnama talaptaryn qatań saqtaýǵa shaqyrdy.
– Qazaqstan Respýblıkasynyń zańnamasyna sáıkes, zańsyz saqtalǵan atys qarýyn, oq-dárilerdi nemese jarylǵysh zattardy óz erkimen tapsyrǵan adamdar ákimshilik jáne qylmystyq jaýapkershilikten bosatylady, - delingen habarlamada.
Eske salsaq, osyǵan deıin Óskemende iri esirtki qoımasy anyqtalyp, 100 kelige jýyq marıhýana tárkilengeni habarlanǵan.
