ShQO-da qarý-jaraqty zańsyz alyp bara jatqan áskerı polıtsııa ofıtseri ustaldy
NUR-SULTAN. QazAqparat – Shyǵys Qazaqstan oblysynyń Úrjar aýdanynda zańsyz atys qarýyn alyp bara jatqan áskerı polıtsııanyń aǵa leıtenanty ustaldy. Bul týraly QR Ekologııa, geologııa jáne tabıǵı resýrstar mınıstrligi Orman sharýashylyǵy jáne janýarlar dúnıesi komıtetiniń baspasóz hatshysy Sáken Dildahmet málim etti, dep habarlaıdy QazAqparat tilshisi.
«2020 jyldyń 22 aqpanynda «Ohotzooprom» mekemesiniń Zaısandaǵy tirek pýnktiniń qyzmetkerleri Maqanshy aýdanynyń polıtsııa qyzmetkerlerimen birge Úrjar aýdanynda reıd júrgizgen edi. Reıd barysynda «Toıota» markaly avtokóliginiń bagajynda zańsyz atys qarýyn alyp bara jatqan áskerı polıtsııanyń aǵa leıtenantyn ustady. Atap aıtqanda, onyń kóliginen tıisti qujaty joq bir atys qarýy (TOZ-8 markaly qarý, 16 kalıbrli eki tegis uńǵyly ańshy qarýy, 12 kalıbrli bir qarý, 16 kalıbrli 87 patron) tabylǵan», - dep jazady Facebook paraqshasynda Sáken Dildahmet.
Atalǵan fakt Úrjar aýdany polıtsııa bóliminiń qylmystyq isterdi tirkeý tiziminde QR QK 287-baby 3-bóligi boıynsha qylmystyq is retinde tirkelip, qazirgi ýaqytta sotqa deıingi tergeý amaldary júrgizilip jatyr.
