ShQO-da qarttar úıiniń shatyryn jóndeý kezinde qarjy jymqyrǵan laýazymdy tulǵalar tergelýde

NUR-SULTAN. QazAqparat - ShQO-da áleýmettik qyzmet kórsetý ortalyǵynyń shatyryn jóndeý kezinde bıýdjet qarajatyn asa iri kólemde urlaý faktisi boıynsha laýazymdy tulǵalarǵa qatysty tergeý bastaldy, dep habarlaıdy Qarjylyq monıtorıng agenttiginiń baspasóz qyzmeti.

«QMA Shyǵys Qazaqstan oblysy boıynsha aýmaqtyq departamenti «QAMQOR» jedel – aldyn alý is sharalary nátıjesinde «Zevakın arnaıy áleýmettik qyzmet kórsetý ortalyǵynyń» shatyryn kúrdeli jóndeýden ótkizý barysynda bıýdjet qarajatyn asa iri kólemde urlaý faktisi boıynsha laýazymdy tulǵalarǵa qatysty tergeýdi bastady.

Qarttar men múgedekter úıiniń laýazymdy tulǵalarynyń 2019 jylǵy qarasha men 2020 jylǵy mamyr aralyǵynda oryndaǵan jumystar aktilerine jalǵan málimetter engizý arqyly 7,4 mıllıon teńge aqsha qarajatyn urlaǵany anyqtaldy» delingen habarlamada.

Qazirgi ýaqytta is boıynsha sotqa deıingi tergeý júrgizilýde.

QR Qylmystyq protsestik kodeksiniń 201-babyna sáıkes ózge málimetter jarııa etilmeıdi.