ShQO-da qarmen órt sóndirgen
ÓSKEMEN. QazAqparat - Shyǵys Qazaqstan oblysynda órt sóndirý kóligi qarly borannyń saldarynan jolda qalǵandyqtan jer úıdegi órtti qarmen sóndirýge týra kelgen, dep habarlaıdy QazAqparat.
ShQO TJD baspasóz qyzmetiniń málimetine súıensek, 29 qańtar kúni saǵat 14.37-de Besqaraǵaı aýdanyndaǵy órt sóndirý qyzmetine 35 shaqyrymdyq jerdegi Qarabas aýylynda úıdiń órtenip jatqandyǵy jaıly habar túsken. Órt sóndirýshiler birden sol jerge bet aldy. Alaıda arnaıy kólikteri qalyń qar men burqasynan jolda qalyp, olar ary qaraı jaıaý jetýge májbúr bolǵan.
«Órt sóndirýsheler jaıaý attanyp, 2 jarym shaqyrymdy artqa tastady. Jetken ýaqytta aǵashtan salynǵan úı tolyǵymen janyp ketipti. Tilsiz jaý sol mańdaǵy sharýashylyq qora-jaılarǵa da jaıyla bastaǵan. Sol kezde órt sóndirýshiler qyzyl jalyndy qarmen óshirdi» - delingen vedomstvo málimetinde.
Órt sóndirý kóligi oqıǵa ornyna jol jergilikti kásipkerdiń tehnıkasymen tazalanǵannan keıin 2 saǵattan soń ǵana jete alǵan. Órt keshki saǵat 20.00 shamasynda tolyqtaı aýyzdyqtaldy. Jaraqat alǵandar men zardap shekkender joq.
«18 jyldyq qyzmet barysynda osyndaı jaǵdaı alǵash ret oryn alyp otyr. Úı órtengen aýylǵa jaıaý qalyń qardy ombylap jetip, tilsiz jaýdy qarmen óshirgenimiz ómir boıyna este qalatyn shyǵar. Aǵashtan salynǵan úı lakpen óńdelipti. Tez janyp ketkeni sondyqtan bolar» - deıdi bólimshe komandıri Igor Kız.
Mamandar órttiń shyǵý sebebi – jylytý peshin paıdalaný jáne salý kezindegi órt qaýipsizdigi erejesin saqtamaý degen boljam qarastyrýda.
