ShQO-da qarda turyp qalǵan kólikterden 25 adam qutqaryldy
ÓSKEMEN. QazAqparat - Qatty boran saldarynan «Almaty-Óskemen» tasjolynda 90 kólik qarda keptelip turyp qaldy. Osy kólikterden 25 adam onyń ishinde 4 bala qutqaryldy, dep habarlaıdy QazAqparat QR ІІM TJK baspasóz qyzmetinen silteme jasap.
«Keshke saǵat 17:00-de qutqarýshylar evakýatsııalanǵan 25 adamdy (tórteýi bala) jylytý beketine jetkizdi. Sonymen qatar qutqarýshylar 25 kólikti Aıagózge deıin ilestirip ákelip tastady», - delingen habarlamada.
Jergilikti atqarýshy organdar kólikter keptelisi bolǵan jerge janarmaı men ystyq taǵam jetkizdi. Oqıǵa bolǵan jerge jaqyn 10 shaqyrym qashyqtyqta Taskesken aýylyndaǵy Úrjar kolledjiniń jataqhanasynda jylytý beketi uıymdastyryldy.
ShQO TJD-nyń Daǵdarys ortalyǵynda qyzmetti úılestirý úshin jedel shtab quryldy. Sondaı-aq 55-38-19 qaýyrt jelisi ashyldy.
Buǵan deıin habarlanǵandaı, 20 qańtarda saǵat 03:50-de «Almaty-Óskemen» respýblıkalyq jolynyń 681 shaqyrymynda Úrjar aýdanynyń aýmaǵynda qatty boran saldarynan qarǵa turyp qalǵan kólikter keptelisi paıda boldy. Onda 7 avtobýs, 45 júk kólik, 30 jeńil kólik jáne 8 shaǵyn júk kóligi tur. Kólikterde shamamen 420 adam bar.
«Jaǵdaıdy barlap kelý úshin TJD-nyń jol talǵamaıtyn eki «KÝNG» kóligine mingen 5 qyzmetker jáne TJK Shyǵys óńirlik aeromobıldik jedel-qutqarý jasaǵy 4 kóligi men 8 qyzmetkeri jóneltildi. Alaıda keptelistegiler kólikterin tastap ketýden bas tartty», - dep atap ótti TJK-daǵylar.
Atalǵan jolda kólik qozǵalysy saǵat 12:00-den beri jabyq tur.
