ShQO-da qaraýsyz qalǵan 4 bala óz úıinde órtenip kete jazdady
ASTANA. KAZINFORM — ShQO-nyń Glýbokoe aýdanyna qarasty Cheremshanka aýylynda jeke turǵyn úıden órt shyqty. Abyroı bolǵanda kórshisi órtenip jatqan úıden eki balany qutqaryp qaldy, dep habarlaıdy TJM.
Tilsiz jaý úıdiń shatyryn, jıhazdaryn jáne jeke zattardy sharpyǵan. Órt bolǵan kezde úıde anasynyń qaraýynsyz tórt bala bolǵan.
— 2012 jáne 2019 jyly týǵan eki úlken bala ózderi úıden shyǵyp, kómek surap kórshi úıge júgirgen. Kórshisi Dmıtrıı Nedozrelov, bir sátke de oılanbastan, janyp jatqan úıge kirip, ishte qalǵan 2021 jáne 2023 jyly týǵan eki sábıdi syrtqa alyp shyqty, — delingen habarlamada.
Oqıǵa ornyna dereý jetken órt sóndirýshiler 45 sharshy metr aýmaqty sharpyǵan jalyndy aýyzdyqtady. Balalar medıtsınalyq mekemege jetkizildi. Qazirgi ýaqytta órttiń sebebi anyqtalyp jatyr.
Óz erligi týraly kópshilike aıtqysy kelmegen Dmıtrıı oqıǵaǵa qatysty qysqasha pikir bildirdi.
— Meniń ornymda kez kelgen er adam dál solaı jasar edi, — dep qysqa qaıyrdy ol.
Eske salsaq, jaqynda Pavlodarda er adam áıeli men úsh balasyn órtten qutqaryp, ózi qurban boldy.