ShQO-da karantın talaptaryn saqtamaıtyn kásipkerler azaımaı tur
SEMEI. QazAqparat – Shyǵys Qazaqstan oblysynda shekteý sharalaryn saqtamaıtyn kásip ıeleri áli de anyqtalýda, dep habarlaıdy QazAqparat tilshisi.
Semeıdegi 50-den astam kásipker qala ákimi Ermak Sálimovpen kezdesip, karantındik shekteýlerdi jeńildetý talabyn qoıdy. Kezdesý barysynda shahar basshysy oblys aýmaǵynda koronavırýstyń taralý qarqyny artyp kele jatqanda qandaı da bir jeńildetý sharalary týraly sóz qozǵaý orynsyz ekenin atap ótti.
«Ekinshi tolqyn kezinde naýryz-maýsym aılaryndaǵy sııaqty qatań shekteýler qabyldanǵan joq. Degenmen, sonyń ózinde kásipkerler zańbuzýshylyqtarǵa jol berip otyr. Máselen, Semeı meıramhanalarynyń birinde ótkizilgen úılený toıy. Onda tanymal sportshylar men óner adamdary jınalǵan. Tipti ruqsat etilmegen toıǵa qatysqandardyń keıbireýleri koronavırýspen aýyryp shyqqandardyń qatarynda. Barlyq erejelerdi saqtaý qajettiligi týraly talaı márte úndeý tastaldy. Dese de shekteýlerdi buzyp jatqandar áli de azaımaı tur», - delingen ShQO Aqparat ortalyǵy taratqan málimette.
Búginde barlyq kásipkerlerge ýaqyt pen adam sany boıynsha shekteýlermen, qashyqtyqty, maska rejımin jáne dezınfektsııalyq sharalardy saqtaı otyryp jumys isteýge ruqsat berilgen. Alaıda soǵan qaramastan, keıbir bıznes ókilderi burynǵydaı jumys istep, karantındik shekteýlerdi jeńildetýdi talap etýde.
«Kásipkerler karantın talaptaryna baǵynbaı COVID-19 ınfektsııasynyń taralýyna yqpal etetinin túsinýi kerek. Semeıdegi kásip ıelerimen kezdesýde koronavırýs jaǵdaıy turaqtalǵanǵa deıin eshqandaı jeńildetý bolmaıtyndyǵy týraly bıliktiń naqty ustanymy aıtyldy. Sebebi tek osylaı ǵana qaýipti derttiń órshýin báseńdetýge bolady», - delingen habarlamada.
