ShQO-da karantın talaptaryn buzýdyń 28 faktisi tirkeldi

ÓSKEMEN. QazAqparat – Shyǵys Qazaqstan oblysynda shekteý sharalaryn buzýdyń 28 faktisi tirkeldi, dep habarlaıdy QazAqparat tilshisi.

Óńirde arnaıy qurylǵan monıtorıngilik toptar karantın talaptarynyń saqtalýyn qadaǵalaý úshin qoǵamdyq kólikterde, dúkenderde, dárihanalar men basqa da mekemelerde kún saıyn reıd júrgizýde.

26 naýryz kúni Óskemende 310 nysan tekserilgen. Nátıjesinde karantın talabyn buzýdyń 12 faktisi anyqtaldy. Sondaı-aq buryn anyqtalǵan buzýshylyqtar boıynsha 350 040 teńge mólsherinde aıyppul salyndy», - delingen ShQO Aqparat ortalyǵy taratqan málimette.

Semeıde tekserý barysynda 314 nysan qamtylǵan. Saýda úıleri men bazarlarda maska rejımin buzǵan 14 adam tirkeldi. Budan bólek, buqaralyq is-shara uıymdastyrǵandar anyqtalǵan. 510 475 teńge somasyna 5 hattama toltyrylyp, 87 510 teńge mólsherinde 2 aıyppul óndirildi.

Rıdder qalasynda monıtorıngilik toptar 74 nysandy aralap, maska rejımin buzýdyń eki faktisin anyqtady.