ShQO-da karantın talabyn saqtamaıtyndar áli de az emes

ÓSKEMEN. QazAqparat – Shyǵys Qazaqstan oblysynda karantın shekteýlerin buzǵandarǵa aıyppul salynyp jatyr, dep habarlaıdy QazAqparat tilshisi.

Óńirdegi shekteý sharalarynyń saqtalýyn baqylaıtyn monıtorıng toptary reıd barysynda turǵyndarǵa kópshilik jerge barmaı, áleýmettik araqashyqtyqty saqtap, maska taǵyp, antıseptık pen bir rettik qolǵapt y paıdalaný syndy sanıtarlyq talaptardy buzbaýǵa shaqyrýda.

Alaıda salynyp jatqan aıyppulǵa qaramastan aımaqta karantın shekteýlerin elemeıtinder áli de barshylyq.

«23 qarasha kúni Óskemende ótken reıd kezinde saýda keshenderi men azyq-túlik dúkenderinde 5 zańbuzýshylyq tirkeldi. Atap aıtqanda, «Zańǵar» saýda úıiniń, «Tomırıs» dúkeniniń, «Imıdj» jáne «Aıda» shashtarazdarynyń jumysshylary medıtsınalyq maskasyz qyzmet kórsetken. Budan bólek, Kókpekti aýdanynda júrgizilgen reıd nátıjesinde sanıtarlyq normalardy buzǵan 67 adamǵa aıyppul salyndy. Glýbokoe aýdanynda bir kúnde sanıtarlyq normalardy buzýdyń 4 faktisi anyqtalǵan» delingen ShQO Aqparat ortalyǵy taratqan málimette.

Sondaı-aq Ulan aýdany Asýbulaq kentindegi «Móldir» men «Ýalıolla G» dúkenderiniń 2 satýshysyna jáne qoǵamdyq orynda medıtsınalyq maskasyz júrgen 2 turǵynǵa qatysty hattamalar toltyryldy.

Zaısan aýdanynda 23 qarashada 9 nysanda reıd júrgizilip, sonyń nátıjesinde 3 zańbuzýshylyq faktisi tirkelip, 319 470 teńge mólsherinde aıyppul salynǵan.