ShQO-da karantın talabyn saqtamaǵandarǵa aıyppul salynyp jatyr

ÓSKEMEN. QazAqparat – Shyǵys Qazaqstan oblysynda bir kún ishinde shekteý sharalaryn buzýdyń 9 faktisi anyqtaldy, dep habarlaıdy QazAqparat tilshisi.

Óńirde arnaıy qurylǵan monıtorıng toptary karantın talabynyń saqtalýyn qadaǵalaý úshin qoǵamdyq kólikte, dúkenderde, dárihanalar men basqa da mekemelerde kún saıyn reıd júrgizýde.

«23 sáýir kúni Semeıde 229 obektige tekserý júrgizildi. Sonyń nátıjesinde qoǵamdyq kólikte, saýda úılerinde, bazarlarda maska rejımin saqtamaýdyń 7 faktisi anyqtaldy. Budan bólek, buryn tirkelgen zańbuzýshylyqtar boıynsha 87 510 teńge mólsherinde 2 aıyppul óndirildi» delingen ShQO aqparat ortalyǵy taratqan málimette.

Sondaı-aq monıtorıng toptary Rıdder qalasynda kásipkerlik nysandardy tekserip, karantın talabyn buzǵan 1 adamdy anyqtady. Kýrchatov qalasynda 30 nysan qamtylyp, shekteý sharalaryn saqtamaýdyń 1 faktisi tirkelgen.

Al Besqaraǵaı, Zaısan, Abaı, Úrjar jáne Aıagóz aýdandarynda eshqandaı buzýshylyq tirkelmegen.

Esterińizge sala keteıik, Shyǵys Qazaqstanda Óskemen, Semeı qalalary men Aıagóz aýdany «qyzyl» aımaqta tur.