ShQO-da qaraqumyq pen qanttyń baǵasyn negizsiz ósirgen kásipker ákimshilik jaýapqa tartyldy
ÓSKEMEN. KAZINFORM – Shyǵys Qazaqstan oblysynyń Saýda jáne tutynýshylardyń quqyqtaryn qorǵaý departamenti áleýmettik mańyzy bar azyq-túlik taýarlarynyń baǵalaryn turaqtandyrýǵa baǵyttalǵan jumystaryn jalǵastyryp jatyr. Bul týraly Saýda jáne ıntegratsııa mınıstrligi habarlady.
Óńirlik komıssııanyń elektrondyq shot-faktýralardy (EShF) taldaý nátıjesinde baǵalardy jasandy túrde kóterý shemasy anyqtaldy. Zertteý barysynda jeke kásipkerdiń deldaldyq býyn qurǵany belgili boldy. Bul kásipker qaraqumyq jarmasy, qant jáne tuz sııaqty taýarlardy satyp alyp, olardy ózine tıesili JShS-ǵa qaıta satqan.
Osy «ózine ózi qaıta satý» tásili arqyly áleýmettik mańyzdy taýarlardyń sońǵy baǵasy negizsiz ósken. Mysaly, qaraqumyq jarmasy baǵasyna 127% saýda ústemesi qosylǵan. Satyp alý baǵasy 241 teńge bolsa, satylýy 550 teńge bolǵan. Qantqa saýda ústemesi 45%-ǵa, al as tuzyna 41%-ǵa jetken.
Qazaqstan Respýblıkasynyń zańnamasyna sáıkes, áleýmettik mańyzy bar taýarlarǵa saýda ústemesi 15%-dan aspaýy tıis. Zań buzýshylyq faktisi boıynsha QR Ákimshilik quqyq buzýshylyq týraly kodekstiń 204-4-baby boıynsha ákimshilik is qozǵalyp, aıyppul salyndy. Nátıjesinde ónimsiz deldaldar jetkizý tizbeginen shyǵarylyp, baǵanyń ádil qalyptasýyna jaǵdaı jasaldy.
Departament mundaı zańsyz áreketterdi anyqtap jatyr. Bıylǵy jyldyń basynan beri óńirdegi 70-ten astam saýda nysanynyń elektrondyq shot-faktýralary taldanyp, onnan astam ónimsiz deldal saýda tizbeginen shyǵaryldy.
Aıta ketsek, osyǵan deıin Abaı oblysynda azyq-túlik baǵasyn negizsiz ósirgen kásipkerlerge shara qoldanylǵan edi.
