ShQO-da qaraqshylardyń kıimin kıgen qutqarýshylar jaǵajaıda erekshe aktsııa uıymdastyrdy
ÓSKEMEN. QazAqparat – Shyǵys Qazaqstan oblysy Kókpekti aýdanynda qutqarýshylar halyqqa sý aıdyndaryndaǵy qaýipsizdik erejelerin túsindirý maqsatynda qaraqshylardyń kıimin kıip, erekshe aktsııa uıymdastyrdy, dep habarlaıdy QazAqparat tilshisi.
ShQO TJD baspasóz qyzmetiniń málimetine súıensek, qaraqshylar bolyp kıingen qutqarýshylar Kókpekti aýdanyndaǵy halyq eń kóp baratyn shomylý ornyna keldi. «Altyn qum» dep atalatyn uzyndyǵy 110 shaqyrymǵa jetetin jaǵalaýda jyl saıyn 50 000-ǵa jýyq adam demalady. Biraq bul ýchaske qaýipsiz emes. Sýǵa shomylý maýsymy bastalǵaly beri munda 5 adam batyp ketken. Jalpy oblys boıynsha sý aıdyndarynda 31 adam, onyń ishinde 8 bala kóz jumdy.
«Aktsııa aıasynda qaraqshylar demalýshylarǵa sýdaǵy qaýipsizdik boıynsha suraqtar qoıdy. Durys jaýap bermeıtinderdi qaraqshylar «urlap áketti». Sondaı-aq shara barysynda jedel qutqarý jasaǵynyń qutqarýshylary matraspen júzgen kezde qalaı batyp ketpeý kerektigin kórsetý úshin sheberlik sabaǵyn ótkizdi. Óıtkeni dál osy sý aıdynynda matraspen júzip júrgen 2 áıel batyp ketken», - dedi departament bastyǵynyń orynbasary Dmıtrıı Tıtov.
Sondaı-aq súńgýirler sýdyń túbin tekserdi. Aktsııa azamattardyń nazaryn sýdaǵy qaýipsizdikke aýdarý maqsatynda uıymdastyrylǵan. Іs-sharaǵa qatysqan Kókpekti aýdandyq jastar resýrstyq ortalyǵynyń eriktileri demalýshylarǵa arnaıy jadynamalar taratyp, túsindirý jumystaryn júrgizýge atsalysty.
