ShQO-da qar mol jaýǵandyqtan kóshkin júrý qaýpi artty

ÓSKEMEN. KAZINFORM – Shyǵys Qazaqstan oblysynyń taýly jerlerinde qar kóshkini júrý qaýpi bar.

ShQO tótenshe jaǵdaılar departamentiniń málimetine súıensek, óńirdiń taýly jerlerinde qar kóshkini júrý qaýpi joǵary. 

- Búginde oblystaǵy qardyń bıiktigi normadan 25%-ǵa artyq. Keı jerlerde qar jamylǵysynyń maksımaldy bıiktigi - 120 sm. Sońǵy birneshe kúnde qar táýligine 20 sm-ge deıin jaýdy. Sonymen qatar burqasyn men kúnniń jylyp ketýi de kóshkin qaýpin arttyryp otyr, - delingen aqparatta. 

Osy rette, kóshkinniń aldyn alý sharalary júrgizilip jatyr. Onyń ishinde jasandy jolmen kóshkin túsirilýde. 

Qys bastalǵaly beri 15 ret profılaktıkalyq qar kóshkini júrgizildi. Sonyń nátıjesinde jalpy kólemi shamamen 6665 tekshe metr qar túsirilgen. 

Eske salsaq, osyǵan deıin Shyǵys Qazaqstan oblysynda bir kúnde eki ret qar kóshkini júrgeni habarlanǵan.