ShQO-da qar qursaýynda qalǵan 95 adam qutqaryldy
ÓSKEMEN. QazAqparat - Shyǵys Qazaqstan oblysynda qar qursaýynda qalǵan 95 adam, onyń ishinde 5 bala qutqaryldy, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, óńir joldarynda apattyq-qutqarý jumystary túni boıy júrgizildi. Táýlik ishinde qutqarýshylar 95 adamdy, onyń ishinde 5 balany qutqaryp, 63 kólikti jolǵa súırep shyǵardy.
«Qazirgi ýaqytta oblystaǵy 5 baǵytta jol jabyq: «Almaty-Óskemen» tasjolynyń 967-1048 shaqyrymy, (Qalbataý aýyly men Ulan aýylynyń aralyǵy), «Semeı-Qaraýyl» tasjolynyń 4-182 shaqyrymy, «Baqyrshyq-Borsaq» tasjolynyń 0-18 shaqyrymy, Borsaq aýyly jolynyń 0-11 shaqyrymy, «Almaty-Óskemen» tasjolynyń 778-967 shaqyrymy (Aıagóz aýdany men Qalbataý aýylynyń aralyǵy)», - dep habarlady vedomstvo ókilderi.
TJD qutqarýshylary kúni-túni Semeı, Jarma, Kúrshim, Úrjar, Tarbaǵataı, Zaısan jáne Kókpekti aýdandarynyń ákimshilik aýmaqtarynda apattyq-qutqarý jumystaryn júrgizdi. Jol talǵamaıtyn kólikpen qar qursaýynda qalǵan adamdar evakýatsııalanyp, kólikter súırep shyǵaryldy.
«Departamenttiń jedel shtaby oblystaǵy jaǵdaıǵa monıtorıng júrgizýde. Azamattarǵa aýa raıyna baılanysty eskertý týraly habarlama alǵanda eldi mekennen alys saparǵa shyqpaý qajettigin eskertemiz. Joldardyń jaı-kúıi týraly «Dármen» mobıldi qosymshasy arqyly bilip otyrýǵa bolady», - delingen aqparatta.
