ShQO-da qar qursaýynda qalǵan 164 adam qutqaryldy
ÓSKEMEN. QazAqparat – Shyǵys Qazaqstan oblysynda 13-14 naýryz kúnderi qar qursaýynda qalǵan 164 adam, onyń ishinde 9 bala qutqaryldy, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, senbi-jeksenbi kúnderi óńir boıynsha 63 kólik qarǵa batqan. Qutqarýshylar Tarbaǵataı, Kókpekti, Kúrshim, Katonqaraǵaı jáne Altaı aýdandaryna aparar joldarda qar qursaýynda qalǵandarǵa shuǵyl kómekke attanyp, 164 adamdy evakýatsııalady. Bul joldar 13 naýryzda aýa-raıynyń qolaısyzdyǵyna baılanysty jabylǵan bolatyn.
«Aldyn ala daýyldy eskertý jasalsa da keıbir turǵyndar eldi mekennen alys jolǵa shyǵyp ketken. Júrgizýshiler polıtsııa beketin aınalyp ótip, jolda qalǵan faktileri de boldy. Qazirgi tańda aımaq aýmaǵynda barlyq oblystyq jáne respýblıkalyq mańyzy bar joldar ashyq tur», - delingen habarlamada.
Osy rette, TJD ókilderi óńir turǵyndaryna daýyldy eskertý jasalǵan kezde alys saparǵa shyqpaý qajettigin eskertedi. Joldardyń jaı-kúıin «Dármen» mobıldi qosymshasy arqyly tekserip otyrǵan abzal. Eger jolda qıyn jaǵdaıǵa tap bolsańyz, dereý «112» nómirine habarlasý qajet.
