ShQO-da qar qursaýynda qalǵan 113 adam qutqaryldy
ÓSKEMEN. QazAqparat – Shyǵys Qazaqstan oblysynda qar qursaýynda qalǵan 113 adam qutqaryldy, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, aldyn ala jasalǵan daýyldy eskertýge qaramastan óńir turǵyndary alys jolǵa shyǵýda. «Altaı-Chapaevo» tasjolynyń 0-37 shaqyrymdaǵy jol ýchaskesinde 45 avtokólik qarǵa batyp qalǵan. Qutqarýshylar shuǵyl kómekke attanyp, 113 adamdy, onyń ishinde 9 balany qutqardy.
Kólikter arnaıy tehnıkanyń kómegimen qardan shyǵaryldy. Apattyq-qutqarý jumystaryna departamenttiń 46 qyzmetkeri men 14 birlik tehnıkasy jumyldyrylǵan.
«Osy rette, óńir turǵyndaryna daýyldy eskertý jasalǵan kezde alys saparǵa shyqpaý qajettigin eskertemiz. Joldardyń jaı-kúıin «Dármen» mobıldi qosymshasy arqyly tekserip otyrǵan abzal. Eger jolda qıyn jaǵdaıǵa tap bolsańyz, dereý «112» nómirine habarlasý qajet», - delingen málimette.
