ShQO-da qar kóshkini júrý qaýpi bar kezeń bastaldy
Shyǵys Qazaqstan oblysynda qar kóshkini júrý qaýpi bar kezeń bastaldy, dep habarlaıdy Kazinform.
ShQO Tótenshe jaǵdaılar departamenti baspasóz qyzmetiniń málimetine súıensek, óńir boıynsha qar kóshkini júrý qaýpi bar kezeń qarasha aıynyń ortasynan sáýirge deıin sozylady.
«Oblys boıynsha 497 ýchaskede qar kóshkini júrýi múmkin. Onyń 325-i nysandarǵa jáne adamdar ómirine qaýip tóndiredi. Sondaı-aq 93 shaqyrym kólik joly qar kóshkinine ushyraýy yqtımal», – deıdi «Qazseldenqorǵaý» mekemesi ShQO fılıalynyń basshysy Sovetbek Stanbekov.
Bıyl Altaı aýdany Zýbovskaıa taýynda jáne Katonqaraǵaı aýdanynyń Sobachıa taýynda qar ustaıtyn qalqandardy jóndeý-qalpyna keltirý jumystary júrgizilgen.
Qar kóshkini negizinen qar kóp jınalatyn taýly aýdandarda bolady. Kóshkinniń túsýine uzaq ýaqyt toqtaýsyz qardyń jaýýy, qarqyndy erýi sebep bolýy múmkin.
Kóshkin adam shýy men aıqaıdan da túsedi. Eger siz adamnyń qar kóshkininiń astynda qalǵanyna kýá bolsańyz, tómendegideı áreket etýińiz kerek:
– Adamdy sońǵy ret kórgen jerdi este saqtańyz jáne sol jerdi belgileńiz.
– Qutqarýshylardy shaqyryńyz.
– Qar kóshkininde qalǵan adamdy izdeńiz. Ony tapqannan keıin eń aldymen basyn bosatyńyz, aýzyn jáne tynys alý joldaryn tazalańyz.
– Júregi toqtap qalý belgileri baıqalǵan kezde reanımatsııalyq sharalarǵa kirisińiz.
– Eger jábirlenýshi esinen tanyp qalmasa, onda ony jylytyp, ystyq sýsyn berińiz.