ShQO-da qar kóshkini júrý qaýpi bar kezeń bastaldy

ÓSKEMEN. KAZINFORM — Shyǵys Qazaqstan oblysyndaǵy taýly jerlerde qar kóshkini júrý qaýpi bar kezeń bastaldy.

ShQO Tótenshe jaǵdaılar departamenti baspasóz qyzmetiniń málimetine súıensek, óńir boıynsha 325 ýchaskede qar kóshkini júrýi múmkin.

— Sol ýchaskelerdiń boıynda 93 shaqyrym jol men túrli ǵımarattar ornalasqan. Eger kóshkin júrse turǵyndardyń ómirine qaýip tónýi múmkin. Sondyqtan «112» qyzmetinen eskertýler jasalsa, qaýip-qaterden aýlaq bolyńyzdar jáne qar kóshkini qaýpi bar joldarmen júrmeńizder, — dep eskertti qutqarýshylar.

Aıta keteıik, oblys boıynsha qar kóshkini qaýpi bar kezeń sáýir aıyna deıin sozylady. Osy aralyqta halyq taýǵa shyqpas buryn aýa raıy jaǵdaıyn qatań eskerýi qajet. 

Eske salsaq, osyǵan deıin Almatyda kóshkin qaýpi bar 85 ýchaske tekserilgeni habarlanǵan.