ShQO-da qar kóshkini qaýpi joǵary ýchaskelerge tikushaqpen barlaý jasaldy
ÓSKEMEN. KAZINFORM — Shyǵys Qazaqstan oblysynda qar kóshkini qaýpi joǵary ýchaskelerge aerovızýaldy monıtorıng júrgizildi.
ShQO tótenshe jaǵdaılar departamenti baspasóz qyzmetiniń málimetine súıensek, barlaý jumystaryna «Qazavıaqutqarý» mekemesiniń tikushaǵy tartyldy.
— «Óskemen qalasy-Taıynty ózeni-Laıly ózeni-Óskemen qalasy» baǵyty boıynsha qar kóshkini men gıdrologııalyq jaǵdaı zertteldi. Sonyń nátıjesinde Samar jáne Ulan aýdandarynyń ákimshilik aýmaǵynda tolyǵymen qar jatqany anyqtaldy. Qar jamylǵysynyń bıiktigi — Taıyntyda — 55 sm, Laılyda — 50 sm-ge deıin jetedi. Qar kóshkininiń ózdiginen túsý qaýpi az. Zerttelgen aýmaqtaǵy qar kóshkini jaǵdaıy turaqty, — delingen aqparatta.
Laıly, Eshkibaı jáne Tómengi Taıynty sý qoımalarynyń bógetterin jappaı muz jaýyp tur. Barlyq gıdrotehnıkalyq qurylystar shtattyq rejımde jumys isteýde.
Eske salsaq, osyǵan deıin Shyǵys Qazaqstanda qar kóshkini túsirilgeni habarlanǵan.