ShQO-da qar kóshkinine baılanysty tasjoldardyń biri jabylady

ÓSKEMEN. QazAqparat – Shyǵys Qazaqstan oblysynda jasandy jolmen qar kóshkini túsirilip jatyr. Osyǵan baılanysty avtojoldardyń biri jabylady, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, 9 aqpanda saǵat 11:00-den bastap óńirdegi tasjoldardyń birinde kólik qozǵalysyna tyıym salynady.

«Jasandy jolmen qar kóshkini júrgizilýine baılanysty oblystyq mańyzy bar «Óskemen-Tarǵyn-Samar» tasjolynyń 95-102 shaqyrymy kóliktiń barlyq túri úshin jabylady. Jol qardan tolyq tazarǵannan soń ǵana ashylady», - delingen aqparatta.

Osy rette, oblystyq TJD mamandary óńir jurtshylyǵyna alys jolǵa shyǵar aldynda barynsha abaı bolýǵa shaqyrady. Tótenshe jaǵdaı týyndaǵan kezde birden «112» telefon nómirine qońyraý shalý qajet.

Eske salsaq, osyǵan deıin Shyǵys Qazaqstanda taýda eki jarylys jasalyp, 5200 tekshe metr qar túsirilgendigin habarlaǵan edik.