ShQO-da qar kóshkini qaýpi kúsheıdi
ÓSKEMEN. QazAqparat - ShQO-da osy aptanyń aıaǵyna deıin qar kóshkini qaýpi saqtalady, dep habarlaıdy QazAqparat tilshisi.
Buǵan deıin kóshkin qaýpi Glýbokoe, Altaı aýdandarynda tirkelse, osy aptada aýqymy keńeıip otyr.
«Óskemen-Severnoe», «Óskemen-Samar», «Óskemen-Altaı», «Sógir-Besúı», «Berel-Rahman» qaınary, «Rıdder - Chekmar» kenishi baǵytyndaǵy joldarda kóshkin túsetin bólikter kóp. 22-27 qańtar aralyǵynda taýly joldarda kóshkin qaýpi saqtalady» delingen oblystyq tótenshe jaǵdaılar departamenti taratqan málimette.
Atalmysh bólikterde qardyń qalyńdyǵy 30-130 sm aralyǵynda. «Qazseldenqorǵaý» mekemesiniń mamandary taýdaǵy qardyń qalyńdyǵyn sát saıyn ólshep, monıtorıng júrgizýde. Óıtkeni 4-5 kún boıy jaýǵan qardyń sońy jylymyqqa ulasady degen boljam bar. Buǵan deıin dál osyndaı aýa raıy Óskemen-Severnoe baǵytyndaǵy joldy qar kóshkini jaýyp qalýyna sebepker bolǵan.
Mamandar taýly joldarda meılinshe abaı bolý kerektigin eskertip otyr.
