ShQO-da qar az túskendikten jerdiń tońy 1,5 metrge jetken
ÓSKEMEN. QazAqparat - Shyǵys Qazaqstanda jerdiń tońy 1,5 metrge deıin jetken. Osynyń saldarynan kóktem týa birneshe aýdanda sý jaıylýy múmkin, dep habarlaıdy QazAqparat tilshisi.
ShQO tótenshe jaǵdaılar departamenti basshysynyń orynbasary Aleksandr Lomygın BAQ ókilderine kóktemge daıyndyq sharalary týraly aqparat berdi. Onyń aıtýynsha, bıyl qardyń az túsýi saldarynan jerdiń tońy tereńdep ketken.
«Oblys boıynsha qardyń ortasha qalyńdyǵy 25 santımetrden aspaıdy. Al «Qagıdromet» mamandary tońnyń tereńdigi 40-150 sm aralyǵynda ekenin aıtyp otyr. Bul ótken jylǵydan jeti ese tereń degen sóz. Ásirese, Besqaraǵaı, Tarbaǵataı, Ulan, Kókpekti, Qatonqaraǵaı, Borodýlıha, Kúrshim aýdandary men Óskemen qalasynyń mańynda jerdiń qatýy erekshe», - dedi Aleksandr Lomygın.
Qańtardaǵy qatty aıaz saldarynan qazirdiń ózinde ózen-sýlardyń arnasy bitelip, qyzyl sýdyń jaıylýyna túrtki bolyp otyr. Qatonqaraǵaı aýdanynyń Kókterek jáne Soldatovo aýyldarynda sý jaıylý qaýpi bar. Solonovka jáne Sarymsaqty ózenderiniń arnasyna muz keptelgeni anyqtalyp otyr.
Al Glýbokoe aýdanynyń Ýshanov kenti men Predgernoe, Ývarov, Praporşıkov, Kojohovo, Cheremshanka aýyldaryn qazirdiń ózinde ózen sýy jıi mazalaýda. Tótenshe jaǵdaı mamandaryn aqpan aıynyń sońǵy onkúndigine boljanǵan aýa raıy málimetteri de alańdatyp otyr. Aqpannyń sońǵy kúnderi aıazdy ári borandy bolý múmkin.
»Qazgıdromet» boljamy boıynsha aqpan aıynda jaýatyn qar mólsheri aılyq mejeden áldeqaıda kóp. Sondyqtan oblystyń basym bóliginde kóktemge daıyndyqty kúsheıtý qajet», - dedi departament ókili.
Qar erý maýsymyna oblys boıynsha 1000 adam men 300 tehnıka tas-túıin daıyn tur. Sý alýy múmkin oryndarǵa 56 júzý jáne sý sorý qurylǵylary jetkizilgen. Apattyq qutqarý jumystaryna «Qazavıaqutqarý» mekemesiniń 9 tikushaǵy tartylmaq.
