ShQO-da qar astynda qalǵan aýyl turǵyndary bir-birine qalaı kómektesip jatyr

ÓSKEMEN. KAZINFORM – Shyǵys Qazaqstan oblysy Kúrshim aýdanynda 7 qańtardan beri qalyń qar jaýyp, boran soǵyp tur. Sonyń saldarynan aýyldardyń halqy qar qursaýynda qalǵan. Biraq soǵan moıymaı, bir jaǵadan bas, bir jeńnen qol shyǵarǵan jurt tabıǵattyń tosyn minezine tótep berýde.

Qar astynda qalǵan aýyldar Prezıdent jarlyǵymen jańadan qurylyp jatqan Marqakól aýdanynda qarasty. Alaıda aýdan áli zań boıynsha resimdelip, naqty shekarasy belgilenbedi.

Osy jyldyń 8 qańtarynda Marqakól aýdanynyń máslıhaty qurylyp, máslıhattyń birinshi sessııasy ótip, tóraǵasy saılandy.

Al aýdan ákimin 25 qańtarǵa deıin taǵaıyndaý josparlanǵan. Tek sodan keıin aýdan ákimi apparatynyń memlekettik mekemesin qurý týraly qaýly, apparatty basqarý shemasy qabyldanbaq.

Sondyqtan ázirshe Kúrshim aýdany dep jazyp otyrmyz.

Qaharyna mingen qys bir aptadan astam ýaqyt boıy aýyldarǵa qardy úıip-tókti. Osylaısha, halyq úılerinen shyǵa almaı, qalamen, aýdan ortalyǵymen baılanys úzilgen.

Jaǵdaıy qıyndaǵan naýqasqa da jedel járdem jete almaı qaldy. Jolda qalǵandar, qystaqta qamalǵandar da bar.

El óristegi malyn qoraǵa aıdaı almaı, ábden áýre-sarsańǵa túsken. Bul týraly bizge marqakóldik Qaıyrhan Baıgúndınov aıtyp berdi.

«Osyndaı qıyn-qystaý sátte jurtymyz jumyla áreket etýde. Bir-birine qoldan kelgenshe kómektesip jatyr. Jolda qalǵan jandarǵa áskerıler de kómek kórsetti. Jaǵdaı qıyndaǵanda aqsha jınastyryp, volonterlerdi izdestire bastadyq. Qar kúreıtin tehnıkalar tartylýda. Shúkir, zardap shekken eshkim joq. Qalyń qardan óristegi jylqy tebindeı almaı qaldy. Maldy qoraǵa jetkizý de muńǵa aınalǵan. Sodan oılana kele jylqylardyń basyn qosyp, Boran aýylyna deıin aıdap ákelip, sonda baǵyp, aman saqtap qalyp jatyrmyz. Mal shyǵyny da joq», — deıdi ol.

Marqakól aýylynda dúken ustap otyrǵan jeke kásipker Nazgúl Amanjolova halyqqa azyq-túlik úlestirip, eriktilerdi jınastyryp, baǵyttap júr. Al Qumarbek Batý esimdi kásipker 100 myń teńgeniń azyq-túligin aýyldastaryna taratqan.

Basqa da kásip ıeleri tasada qalmaı zattaı, qarjylaı kómektesýde. 50-den astam adamnan quralǵan eriktiler toby qarttar turatyn úılerdiń esik aldyn kúrep, tóbelerin qardan tazartyp, aǵash-kómirlerin daıyndaýda.

«Shanaǵatty aýylynda elektr jelisi úzilip, turǵyndar jaryqsyz otyr. Elektrshiler aýylǵa jete almaýda. Keshe Uranhaıka aýylyna ShQO Tótenshe jaǵdaılar departamentiniń 2 qar tazalaǵysh tehnıkasy jumyldyryldy. Tósqaıyń aýylynda aýyryp jatqan kisige búgin tikushaq ushyp keldi. Aýdandaǵy jaǵdaı oblys ákimdiginiń baqylaýyna alynypty. Buny estip qýandyq. Buryn 1966 jyly bizde týra osyndaı jaǵdaı bolǵan. Ol kezde men balamyn. Onda da tikushaqtar tartylǵan edi», — deıdi Qaıyrhan Baıgúndınov.

Aıta keteıik, qazirgi ýaqytta Kúrshim aýdanynda jergilikti aýqymdaǵy tabıǵı sıpattaǵy tótenshe jaǵdaı jarııalanǵan.