ShQO-da qańǵybas ıt aýlada oınap júrgen balaǵa tap bergen
ÓSKEMEN. QazAqparat – Shyǵys Qazaqstan oblysy Besqaraǵaı aýdanynda qańǵybas ıt tórt jasar balaǵa tap bergen, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, Besqaraǵaı aýdandyq polıtsııa bóliminiń saqshysy Aıdar Qabıdenov kópqabatty úıdiń aýlasynan ótip bara jatqanda oınap júrgen balalardy baıqady.
«Kenet balalardyń birine qańǵybas ıt tap berdi. Polıtsııa qyzmetkeri birden kómekke umtylǵan. Alaıda birneshe sekýnd ishinde ıt balaqaıdyń qolyn tistep aldy», - dep habarlady vedomstvo ókilderi.
Ittiń nazaryn ózine aýdarǵan tártip saqshysy lezde balany kóterip alǵan. Sodan keıin ony Besqaraǵaı aýdandyq ortalyq aýrýhanasyna jetkizdi. Dárigerler balaqaıǵa medıtsınalyq kómek kórsetti. Qazir onyń densaýlyǵyna eshqandaı qaýip tónip turǵan joq.
Al balanyń anasy bolsa polıtsııa kapıtanyna alǵys aıtty.
