ShQO-da qandala qaptap ketti. Mamandar ne deıdi
ÓSKEMEN. QazAqparat – Shyǵys Qazaqstandaǵy qalalardyń birinde qandala qaptap ketti degen aqparat taraǵan bolatyn. Mamandar jaǵdaıǵa baılanysty naqty jaýap berdi, dep habarlaıdy QazAqparat.
Dálirek aıtsaq, aǵash qandalasy Altaı qalasynda kóbeıe túsken. Jándikterdiń qandaı da bir juqpaly ınfektsııa taratýynan qoryqqan turǵyndardyń mazasyzdanǵandyǵy shyndyq. Al aýdandyq epıdemıologııa baqylaý bólimi mamandarynyń aıtýynsha, aǵash qandalasy adam densaýlyǵyna qaýip tóndirmeıdi. Sondaı-aq ınfektsııa taratpaıdy.
– Sol sebepti qandaı da bir qarsy shara qabyldaýdyń negizi joq. Máselen kene qaptaǵan jaǵdaıda, birden zararsyzdandyrý jumystaryn júrgizemiz. Óıtkeni olar adam densaýlyǵyna tikeleı qaýip tóndiredi. Aıtalyq birqatar qaýipti aýrýlardy janýarlardan adamǵa tasymaldaýǵa beıimdelgen... Al eger qandala úıdiń ishine qaptap ketse, sóz basqa. Mundaı jaǵdaıda turǵyndar shaǵym jasap, dezınfektsııalaý zerthanalaryna júgine alady, – deıdi atalmysh bólimniń qyzmetkeri Latıpa Muratbekqyzy.
Mamandardyń sózine súıensek, kúnniń jylynýyna baılanysty jándikterdiń kóbeıe túsýi negizinen qalypty jaǵdaı. Osy oraıda aıta ketýimiz kerek, «tal-búrgen nemese qamys-qýraıdyń arasynan bolmasa, úıdiń aýlasyna ıa ishine qaptap kirgen qandalalardy kórmedik» degen turǵyndar da bar. Osyǵan qaraǵanda, aǵash qandalasynyń sany aýa raıyna baılanysty jáne belgili bir aýmaqta ǵana arta túsken bolýy múmkin.
