ShQO-da Qalǵuty ózeni arnasynan asyp, joldy sý shaıyp ketý qaýpi tóndi
ÓSKEMEN. KAZINFORM – Shyǵys Qazaqstan oblysynda arnasynan asyp ketken Qalǵuty ózeniniń sýyn ótkizý úshin jol jyrylyp, arna salyndy.
12 sáýirde mol jaýǵan jaýyn-shashynnyń saldarynan Kúrshim aýdanyndaǵy Qalǵuty ózeniniń sýy arnasynan shyǵyp, jazyq aýmaqqa jaıylǵan.
Aýdan ákimdiginiń habarlaýynsha, oblystyq mańyzy bar «Kúrshim-Aqsýat» jolynyń 23 shaqyrymynda tasjoldy sý shaıyp ketý qaýpi tóndi. Jınalǵan sýdy ótkizý úshin jol jyrylyp, arna salyndy. Bul jol Amanat, Jolnusqaý jáne Aqsýat eldi mekenderin jalǵaıdy.
«Qazirgi tańda, turǵyndar aýyldarǵa aınalma jolmen jetip jatyr. Atalǵan eldi mekenderde barlyǵy 705 adam turady. Joldy qalpyna keltirý jumystaryna qajetti materıaldar daıyndalyp, tasymaldanýda. Sý deńgeıi tómendegennen keıin jóndeý jumystary birden bastalady», — delingen aqparatta.
Oqıǵa ornynda Kúrshim aýdanynyń ákimi, «OblShyǵysJol» JShS men kommýnaldyq kásiporyndardyń ókilderi júr.
