ShQO-da izdeýde júrgen 3,5 mln teńge bereshegi bar er adam tabyldy
ÓSKEMEN. QazAqparat – Shyǵys Qazaqstan oblysynyń polıtseıleri izdeýde júrgen 3,5 mln teńge bereshegi bar er adamdy tapty, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, Zaısan aýdandyq polıtsııa bólimine 3 500 000 teńge qaryzy bar 53 jastaǵy boryshkerge izdeý jarııalaý týraly sot oryndaýshysynyń qaýlysy kelip tústi.
Belgili bolǵandaı, er adam Tarbaǵataı aýdanyndaǵy tasjolda memlekettik mekemege tıesili «Skoda» qyzmettik avtokóliginde jol-kólik oqıǵasyna túsken. Óskemen qalalyq sotynyń sheshimi boıynsha ol materıaldyq shyǵyndy óteýge mindettelgen. Alaıda azamat aqsha tóleýden jaltardy.
«Іzdestirý is-sharalary barysynda kóshi-qon qyzmetiniń mamandary bir táýlik ishinde boryshkerdi tapty. Er adam Zaısan qalasynda júrgen. Endi qaryzdy óndirip alýmen sot oryndaýshylary aınalysady», - dedi oblystyq PD Kóshi-qon qyzmeti basqarmasynyń bastyǵy Erbol Bekpaev.
