ShQO-da iz-túzsiz joǵalyp ketken malshynyń denesi tabyldy
ÓSKEMEN. QazAqparat – Shyǵys Qazaqstan oblysy Úrjar aýdanynda iz-túzsiz joǵalǵan malshy sýǵa batyp ketken, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, 21 sáýir kúni joǵalǵan maldy izdeýge shyqqan 1987 jylǵy er adam sol kúıi habar-osharsyz ketken. Týǵan-týystary polıtsııaǵa habarlasqan soń, birden izdestirý jumystary qolǵa alyndy. Jergilikti turǵyndar malshynyń jeke zattaryn Úrjar ózeniniń jaǵasynan tapqandyqtan tártip saqshylary ony sýǵa batyp ketti dep boljaǵan.
Alǵashqy kúnderi joǵalǵan azamatty izdeýge qutqarýshylar men órt sóndirýshiler kiristi. Esh nátıje bolmaǵan soń 30 sáýirde Óskemen qalasynan kelgen jedel-qutqarý jasaǵynyń qyzmetkerleri jumyldyrylǵan.
«Іzdestirý jumystaryna súńgýirler de tartyldy. Olar laı ózenge 9 ret súńgidi. Sondaı-aq qaıyqpen jaǵalaýdy, qulaǵan aǵashtardyń mańyn tekserdik. 2 mamyr kúni sý aıdynyn sholyp shyqqanymyzda sol jerden 5-6 shaqyrymdaı qashyqtan er adamnyń denesi tabyldy. Qazir máıit aýdandyq polıtsııa bólimine berilgen», - dedi jedel-qutqarý jasaǵynyń bas qutqarýshysy Ermek Tilegenov.
