ShQO-da iz-tússiz joǵalyp ketken er adam tabyldy
ÓSKEMEN. QazAqparat – Shyǵys Qazaqstan oblysy Glýbokoe aýdanynda polıtsııa qyzmetkerleri iz-tússiz joǵalyp ketken Óskemen qalasynyń turǵynyn taýyp aldy, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, tártip saqshylary Úlbi ózeninde sýǵa batyp bara jatqan er adamdy baıqap qalyp, birden kómekke umtylǵan. Ony sýdan alyp shyqqan soń, aty-jónin surady. Sol kezde azamat óziniń adasyp ketip, úıine qaıta almaı júrgendigin jetkizgen.
«Anyqtalǵandaı, Aleksandr Gýrbanov 16 shildede jumysqa ketip, sol kúıi úıine qaıtyp oralmaǵan. 3 kúnnen keıin onyń áıeli polıtsııaǵa júginip, kúıeýiniń habar-osharsyz ketkenin habarlady. Jedel-izdestirý sharalary júrgizilgenimen ony tabý múmkin bolmaǵan edi», - delingen habarlamada.
Qazirgi ýaqytta oqıǵanyń mán-jaıy anyqtalyp jatyr. Er adam óz kezeginde ómirin ajaldan arashalap qalǵan polıtsııa qyzmetkerlerine alǵysyn bildirdi.
