ShQO-da iri kólemde sıntetıkalyq esirtki tárkilendi
ShQO Polıtsııa departamentiniń baspasóz qyzmetinen málim etkendeı, 4 aqpan kúni polıtsııa qyzmetkerleri esirtki satýmen aınalysqan Almaty oblysynyń turǵynyn ustady. Ol Óskemende jaldamaly páterde turǵan. Satylatyn esirtkilerdi qalanyń ártúrli jerine jasyryp ketý fýnktsııasyn atqarǵan. Baspanasyn tintý kezinde qyzǵylt, kók jáne aq tústi untaqtar salynǵan 40-tan astam orama tabyldy. Sondaı-aq kók, qara jáne jasyl tústi ızolenta, 41 polımerli paket (stıkerler), eki orama folga men elektrondy tarazy tabyldy.
Saraptama qorytyndysyna sáıkes, tabylǵan zat – jalpy salmaǵy 92,14 gramdy quraıtyn «alfa-pırrolıdınovalerofenon» esirtkisi ekendigi anyqtaldy.
«Tergeý barysynda kúdikti Óskemenge psıhotroptyq zattardy ázirlep, olardy belgili bir orynǵa jasyryp ketý jolymen ınternet arqyly satý úshin bıylǵy qańtardyń sońynda Almaty qalasynan kelgenin moıyndady. Qazirgi ýaqytta kúdikti qamaýǵa alynǵan. QR Qylmystyq kodekstiń 297-baby (Esirtki, psıhotroptyq zattardy, sol tektesterdi ótkizý maqsatynda zańsyz daıyndaý, qaıta óńdeý, ıemdený, saqtaý, tasymaldaý, jóneltý ne ótkizý) boıynsha sotqa deıingi tergeý amaldary júrgizilýde», - delingen vedomstvo málimetinde.