ShQO-da iri kólemde astyq urlaǵan kásipker sottaldy
ÓSKEMEN. QazAqparat – Shyǵys Qazaqstan oblysynda nan qabyldaýmen aınalysqan «Shyǵys-Astyq» JShS dırektory iri kólemde astyq urlaǵany úshin sottaldy, dep habarlaıdy QazAqparat.
Borodýlıha aýdandyq sotynyń málimetine súıensek, aıyptalýshy «Shyǵys-Astyq» JShS-niń qoımasynda saqtaý týraly shart aıasynda aımaqtaǵy aýyl sharýashylyǵy taýarlaryn óndirýshilerden satyp alynǵan jáne «Prodkorporatsııa» AQ-ǵa ornalastyrylǵan astyqty belgisiz bireýlerge bergen.
«Astyq jetispeýshiligi 11 022,223 tonnany qurady. onyń ishinde 10 869,103 tonnasy - úshinshi klasty bıdaı jáne 153,12 tonnasy - kúnbaǵys. Osynyń saldarynan memleketke iri kólemde, naqty aıtqanda 1 mıllıard 444 mıllıon 960 myń 877 teńge mólsherinde zalal keltirilgen», - dep habarlady sottyń baspasóz qyzmeti.
Sot úkimimen sottalýshy segiz jylǵa bas bostandyǵynan aıyryldy. Ol óz jazasyn qaýipsizdigi ortasha túzeý mekemesinde óteıtin bolady.
