ShQO-da ınvestorlarǵa barlyq jaǵdaı jasalǵan
ASTANA. QazAqparat - Shyǵys Qazaqstan oblysynda ındýstrııalyq-ınnovatsııalyq damý memlekettik baǵdarlamasy qalaı júzege asyrylýda, qysqy jylytý maýsymyna ázirlik qandaı, oblystyq máslıhat bıyl qandaı sharýalardy tyndyryp úlgerdi? Bul máseleler oblystyq máslıhattyń selektorlyq rejımdegi kezekti VI sessııasynda qaraldy. Sessııaǵa oblys ákiminiń orynbasary Qýat Tumabaev qatysty, dep jazady «Dıdar» gazeti.
Alǵashqy másele boıynsha baıandama jasaǵan oblystyq kásipkerlik jáne ındýstrııalyq-ınnovatsııalyq damý basqarmasy basshysynyń mindetin atqarýshy Maqsat Músápirbekov 2015-2019 jyldarǵa arnalǵan baǵdarlamany júzege asyrýda tıisti basqarma men qala, aýdan ákimderi josparlanǵan sharýalardy atqaryp jatqandyǵyn málim etti.
Onyń sózinshe, aǵymdaǵy jyldyń jeti aıy ishinde negizgi kapıtalǵa ınvestıtsııa kólemi 174,6 mlrd. teńgeni quraǵan. Bul ótken jyldyń sáıkes merzimimen salystyrǵanda 19,7 paıyzǵa kem. Basty sebep - Aıagóz aýdanyndaǵy «KAZ Minerals Aktogai» Qazaqmys korporatsııasynyń Aqtoǵaı KBK qurylysyna salymdardy azaıtýy. Sondaı-aq, aǵymdaǵy jyldyń sońyna deıin Indýstrııalandyrý kartasynyń jobalary jáne ónerkásiptik kásiporyndar ınvestıtsııalary esebinen ınvestıtsııalar kóleminiń ósimi kútilýde.
Búgingi ýaqytta oblystyń Indýstrııalandyrý kartasyna 19 myń jumys ornyn qurýmen 1 trıllıon 159,9 mln. teńgeni quraıtyn 82 joba qosylǵan. Olardyń 75 paıyzy joǵary ónimdilik kórsetýde. Bul kórsetkish - óńirdiń ınvestıtsııalyq belsendiligine anyq dálel. Al jalpy Indýstrııalandyrý kartasyn iske asyrý bastalǵaly beri 48 joba iske qosylsa, jeti myńnan astam jumys orny qurylǵan. Bıyl 435 jumys ornyn qurýǵa múmkindik beretin jeti jobany iske qosý kózdelgen. Baıandamashy budan ózge qalalar men aýdandarda bıyl iske qosylýy tıis iri jobalarǵa da toqtalyp ótti.
Sonymen birge, ol oblysta Ult josparyn iske asyrý aıasynda ótken qańtar aıynda HQKO janynan ınvestorlarǵa qyzmet kórsetý sektory qurylǵanyn da atap ótti. ıAǵnı, ınvestorlar endi barlyq memlekettik qyzmetterdi «bir tereze» qaǵıdaty boıynsha avtomattandyrylǵan júıede ala almaq. Qoryta aıtqanda, bizdiń óńir ınvestorlar úshin asa qolaıly sanalýda jáne bizdiń taraptan olardy tartýǵa barlyq múmkindikter jasalyp otyr. Bul maqsatta oblys ákiminiń bastamasymen óńirlik keńes te qurylǵan.
Oblystyq máslıhattyń depýtaty Bolat Nurasyl baıandamada aıtylǵandardy áriptesteri quptaıtynyn aıta kele, keleshekte iri jobalarmen qatar, aýdan-qalalardaǵy qarjylaı qoldaýǵa muqtaj shaǵyn jobalardy da eskerýdi usyndy.
Saılaýshylarmen tyǵyz baılanysta jumys isteıdi
Oblystyq máslıhattyń hatshysy Vladımır Golovatıýk bıyl atqarǵan jumystarynyń esebin berdi. Osymen altynshy ret shaqyrylyp otyrǵan oblystyq depýtattyq korpýs 2016 jyldyń naýryz aıynan beri jumys istep keledi. Óńirdiń barlyq máseleleri depýtattar nazarynan tys qalǵan emes, olar saılaýshylarmen tyǵyz baılanysta bolyp, qajetti aqparattardy berip otyrady. Máselen, aǵymdaǵy jyldyń alty aıynda 393 kezdesý ótkizip, 1659 adamdy jeke máselelerimen qabyldaǵan. Saılaýshylardy tolǵandyrǵan ózekti máseleler boıynsha ártúrli organdarǵa 146 saýal joldansa, 17 másele boıynsha aryz ıelerine túsinik berilip, 412 másele oń sheshimin tapqan. Olardyń 50-den astamy materıaldyq jáne qarjylaı kómek kórsetý arqyly sheshilgen. Basqa da 149 másele depýtattar nazarynda tur.
Máslıhat hatshysynyń aıtýynsha, máslıhat janynda «Nur Otan» partııasynyń depýtattyq fraktsııasy jumys isteıdi. Partııa múshesi bolyp tabylatyn depýtattar qoǵamdyq qabyldaýǵa da belsene aralasady. Memleket basshysynyń reformalyq saıasatyn ustanýshylar ári belsendi júrgizýshiler bolyp tabylatyn olar az qamtylǵan otbasylarǵa, mektepterge, balabaqshalarǵa, zeınetkerlerge, túrli sharalardy ótkizýge materıaldyq kómek berýden de tys qalǵan emes.
Jylytý maýsymyna daıyndyq aıaqtalyp keledi
Aımaqtyń qysqy jylytý maýsymyna daıyndyǵy boıynsha esep bergen oblystyq energetıka jáne turǵyn úı-kommýnaldyq sharýashylyq basqarmasy basshysynyń mindetin atqarýshy Rınat Omarov daıyndyq belgilengen kestege saı júrip jatqanyn atady.
Bekitilgen kestege sáıkes bıyl JEO-da qazandyqtardy daıyndaý 90, týrboagregattardy ázirleý 98 paıyzdy quraıdy. Sondaı-aq, SES-ta 23 gıdroagregatty jóndeý qajet bolsa, onyń 20-sy jóndelgen, bul - 88 paıyz kórsetkish.
Baıandamashynyń aıtýynsha, qazirgi ýaqytta elektrmen qamtý nysandary daıyndyǵynyń ortasha kórsetkishi - 98 paıyz. Al bilim berý, densaýlyq saqtaý, áleýmettik qorǵaý nysandary, turǵyn úıler qysqa tolyqtaı daıyn. Semeı qalasynda «Jylýkommýnenergo» MKK menshik qarajaty esebinen 249,8 mln. teńgeniń jóndeý jumystaryn júrgizse, «Nurly jol» baǵdarlamasynyń aıasynda 2015 jyldan bastap Semeı qalasyn jylýmen qamtý nysandaryn damytý boıynsha 10 joba júzege asyrylýda. Qazir tórt joba aıaqtalǵan. Áleýmettik qorǵaý nysandaryna qajetti kómir qory tolyq jetkizilip, bilim men densaýlyq saqtaý salasyna qajetti qatty otynnyń alǵashqy bólikteri tasylǵan. Aldaǵy jylytý maýsymyn oıdaǵydaı ótkerýdi múltiksiz baqylaýǵa alý jáne ótkizýdi úılestirý basqarma basshylyǵyna jáne qala-aýdan ákimderine tapsyryldy.
Oblystyq ekonomıka jáne bıýdjettik josparlaý basqarmasynyń basshysy Almashan Smatlaev ártúrli máseleler boıynsha baıandama jasasa, depýtat, D.Serikbaev atyndaǵy ShQMTÝ rektory Jasulan Shaımardanov jınalǵandar aldynda oblys mektepterin bitirgen túlekterdiń nelikten kórshiles, atap aıtqanda, Reseı Federatsııasynyń shekaralas oblystaryndaǵy joǵary oqý oryndaryn tańdaıtyndyǵyna aýqymdy taldaý jasady. Esterińizde bolsa, ol oblys ákiminiń tapsyrmasyna sáıkes atalǵan másele boıynsha qurylǵan jumys tobyna jetekshilik etýde.
Sondaı-aq, sessııada buǵan deıin birneshe shaqyrylym depýtaty bolǵan Nurjan Túsipova «Qazaqstannyń Qurmetti depýtaty» atanyp, arnaıy tósbelgimen marapattaldy. Qurmetti ataqty máslıhat hatshysy Vladımır Golovotıýk saltanatty jaǵdaıda tabystap, burynǵy áriptesteri quttyqtaýlaryn bildirdi.
Sessııada qaralǵan barlyq máseleler boıynsha tıisti sheshim qabyldandy.
