ShQO-da ınternettegi alaıaqtardyń arbaýyna 700-den astam adam ilikken

ÓSKEMEN. KAZINFORM - Shyǵys Qazaqstan oblysynda osy jyldyń basynan ınternet-alaıaqtyqtyń 700-den astam faktisi tirkeldi. 

Bul týraly ShQO PD krımınaldyq polıtsııa basqarmasynyń aǵa jedel ýákili Nuraı Arystanbek ShQO Óńirlik kommýnıkatsııalar qyzmetinde ótken baspasóz konferentsııasynda málimdedi.

- Aqparattyq tehnologııalardyń damýymen birge alaıaqtardyń da qoldanatyn ádisteri kóbeıe tústi. Eń keń taralǵan ádister - ózin bank pen kommýnaldyq qyzmetker retinde tanystyrý, memlekettik organdardyń atynan habarlasý jáne zııandy siltemeler arqyly messendjerlerdi buzý. 2024 jyldyń 11 aıynda 700-den astam turǵyn aıaqtardan zardap shekken, - dedi ol.

Internet-alaıaqtyqpen kúresýdiń tıimdi ádisteriniń biri — aldyn alý sharalaryn júrgizý. Sondyqtan óńirde aqparattyq-profılaktıkalyq sharalarǵa basymdyq berilip otyr.

- Mylasy, kesheli beri oblysta «Antı-Frod» sharasy bastaldy. Sonymen qatar «Stop-alaıaq» sharasy da únemi júrgizilip turady. Polıtsııa qyzmetkerleri turǵyn úılerdi aralap, ınternet-alaıaqtyqtyń túrleri týraly eskertýler jasap, halyqtyń qarjylyq jáne quqyqtyq saýattylyǵyn arttyrý maqsatynda aqparat taratyp jatyr. Búgingi kúni qylmystardy tıimdi tergeý úshin Shyǵys Qazaqstan oblysy Polıtsııa departamenti janynan kıberqylmystardy ashýmen aınalysatyn arnaıy «Kıberpol» bólimi qurylǵan, - dedi Nuraı Arystanbek.

Eske salsaq, osyǵan deıin Shyǵys Qazaqstanda alaıaqtardyń ózderin kommýnaldyq qyzmetker retinde tanystyryp júrgeni habarlanǵan.