ShQO-da ınfektsııalyq statsıonarlar 21 paıyzǵa toly

ÓSKEMEN. QazAqparat – Shyǵys Qazaqstan oblysynyń medıtsınalyq mekemeleri koronavırýstyń jańa tolqynyna daıyn, dep habarlaıdy QazAqparat tilshisi.

Qazirgi ýaqytta óńir boıynsha vırýs juqtyrǵandar sany kúrt artty. Dese de, oblystyń medıtsınalyq mekemeleri naýqastardy qabyldaýǵa tolyqtaı daıyn. Bul týraly Densaýlyq saqtaý basqarmasynyń basshysy Ermek Omarbekov málim etti.

Onyń aıtýynsha, óńirde ınfektsııalyq statsıonarlarda tórt myńnan astam tósek-oryn bar. Onda qazir 900-ge jýyq adam emdelip jatyr. Sondaı-aq 350-den astam reanımatsııalyq tósek-oryn qamtylǵan. Reanımatsııa jáne qarqyndy terapııa bólimshesinde 76 naýqas em alýda. Jalpy, oblystyń tósek qory 21 paıyzǵa tolǵan.

«Aımaq basshysy Danıal Ahmetovtiń tóraǵalyǵymen kún saıyn óńirlik shtab otyrysy ótip, onda oblystaǵy epıdemıologııalyq jaǵdaı talqylanady. Aýrýhanalar qajetti jabdyqtarmen tolyq jabdyqtalǵan. Bizde rentgen, ókpeni jasandy jeldetý, ottegi kontsentratorlary jáne kompıýterlik tomograftar bar. Dári-dármekter men jeke qorǵanys quraldarynyń qory da jetkilikti», – dedi Ermek Omarbekov.