ShQO-da ımmýndyq plazmanyń 7 myńǵa jýyq dozasy daıyndaldy

ÓSKEMEN. QazAqparat – Shyǵys Qazaqstan oblysynda koronavırýs juqtyrǵan naýqastar ımmýndyq plazmamen sátti emdelip jatyr, dep habarlaıdy QazAqparat tilshisi.

ShQO ákiminiń orynbasary Shákárim Buqtuǵutovtyń aıtýynsha, oblystyq qan ortalyǵy koronavırýspen aýyratyn naýqastardy emdeý úshin el boıynsha birinshi bolyp ımmýndyq plazmany daıyndaı bastady.

Sol kezde aımaq basshysy Danıal Ahmetov ımmýndyq plazma bankin qurýdy tapsyrǵan.

Qan ortalyǵy donorlardy irikteý, plazma jınaý jumystaryna kiristi.

- Qazirgi ýaqytta qannyń ártúrli toptaryndaǵy plazmanyń 6 639 dozasy daıyndaldy. Óńirdiń medıtsınalyq mekemelerimen ózara is-qımyldyń naqty mehanızmi nátıjesinde ımmýndyq plazma turaqty negizde aýrýhanalarǵa jiberilip turady, - dedi Shákárim Buqtuǵutov.

Búginde naýqastarǵa 1 846 doza plazma quıyldy.

Ol oblystyń 953 turǵynyna koronavırýstan jazylýǵa kómektesti.