ShQO-da ımam 2 balasymen birge sýǵa aǵyp ketti
ÓSKEMEN. QazAqparat - Shyǵys Qazaqstannyń Kúrshim aýdanynda balasyn qutqaram dep sýǵa ketken ımamnyń denesin izdeýde, dep habarlaıdy QazAqparat tilshisi.
Qaıǵyly oqıǵa jeksenbi kúni Boran aýylynda bolǵan. Aýyl ımamynyń 8 jasar balasy Qara Ertiske shomylyp júrgen. Qatty aǵysqa tótep bere almaǵan bala bata bastaıdy. Ony qutqarýǵa 36 jastaǵy ákesi men 19 jastaǵy aǵasy da sýǵa sekiredi. Kýágerlerdiń aıtýynsha, sýdyń aǵysyna eresekter de tótep bere almaǵan. Saldarynan aýyl ımamy eki balasymen birge sýǵa ketken.
«Qazir taý ózenderi tasyp jatqandyqtan, sý laı, aǵysy qatty. Ózen boıynda ıirimder kóp. Qutqarýshylar marqumdardyń denesin motorly qaıyqpen izdeýge májbúr. Súńgýirler tereń ıirimderge tap bolýy múmkin. Sondyqtan izdeý jumystary asqan saqtyqpen júrgizilýde», - deıdi shyǵys óńirlik aeroutqyr qutqarý jasaǵynyń №9 bólimshe basshysy Talǵat Nurjanov.
Imam men onyń uldaryn izdeýge aýyldastary da atsalysýda. Jalpy izdeý jumystaryna 80 adam, 11 qaıyq jumyldyrylǵan.
Demalys kúnderi qutqarýshylar úshin mazasyz ótti. Zaısan kólinde 10 kún buryn joǵalǵan balyqshylardan áli derek joq. Al Úrjar aýdanyndaǵy Sasyqkólden balanyń denesi izdestirilýde. Óskemenniń ózinde qutqarýshylar 31 jastaǵy jigittiń denesin Ertisten izdep júrgeli aıǵa jýyq ýaqyt boldy.
