ShQO-da ıisshil ıtterdiń kómegimen 30-dan astam qylmys ashyldy
ÓSKEMEN. QazAqparat –Shyǵys Qazaqstan oblysynyń polıtsııa 2021 jyldyń basynan beri qyzmettik ıtterdiń kómegimen 30-dan astam qylmysty ashty, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetinshe, óńir polıtsııasynda 80-nen astam ıt bar. Onyń ishinde 41 ıt izge túsý jumysyna, 14 ıt esirtki zattaryn tabýǵa, 13 ıt jarylǵysh zattardy izdeýge tartylady. Sonymen qatar shabýylǵa shyǵatyn – 2, kúzette - 5, ıisterdi óte jaqsy ajyratatyn – 4 ıt saqshylarǵa kómek kórsetýde. Tórt aıaqty «polıtseıler» qylmys bolǵan jerlerge birge baryp, qylmyskerdi jyldam tabýǵa, jarylǵysh zattardy, esirtkiler men oq-dárilerdi izdeýge atsalysady.
«Sonymen qatar ıtter ártúrli kópshilik is-sharalar ótkiziletin jerlerde tártipti qamtamasyz etedi. Jedel tergeý tobynyń quramynda oblys boıynsha iz kesý jumysyna shyǵady. Jedel-izdestirý is-sharalaryn júrgizý kezinde Semeı jáne Shemonaıha beketterinde táýlik boıy kezekshilikte bolady», - delingen habarlamada.
2021 jyly ınspektor-kınologtar qyzmettik-izdestirý ıtterimen birge 900-den astam oqıǵa ornyna barǵan. Onyń ishinde esirtki qylmysyna qarsy is-qımyl baǵyty boıynsha – 43, jarylǵysh zattardy izdeýge – 345 ret tartyldy.
«Jyl basynan beri qyzmettik ıtterdiń kómegimen 32 qylmys ashyldy. Onyń ishinde esirtki zattardyń zańsyz aınalymyna baılanysty 16 qylmys boldy. Arnaıy operatsııalardy ótkizý kezinde zańsyz aınalymnan shamamen 500 gramm esirtki tárkilengen», - dedi ShQO PD kınologııalyq qyzmet ortalyǵynyń bastyǵy Ómirzaq Qasaıynov.
