ShQO-da ıis tıgen erli-zaıyptylar aýrýhanaǵa jetkizildi
ÓSKEMEN. QazAqparat – Shyǵys Qazaqstan oblysynyń Altaı aýdanynda erli-zaıyptylarǵa ıis tıgen, dep habarlaıdy QazAqparat tilshisi.
ShQO tótenshe jaǵdaılar departamenti baspasóz qyzmetiniń málimetine súıensek, oqıǵa taıaýda Altaı aýdany Turǵysyn aýylynda bolǵan. Orta jastaǵy er adam men áıel shamamen saǵat 20.00-de jer úıde kómirmen pesh jaqqan.
Qatty otynnyń janǵanyn teksermegen olar murjany jaba salypty.
«Tún ortasynda áıeldiń júregi aınyp, basy aınala bastaǵan. Dálizge shyqqan ol esinen tanyp qaldy. Áıteýir biraz ýaqyttan keıin áıel esin jıyp, jedel járdem shaqyrǵan», - dep habarlady vedomstvo ókilderi.
Zardap shekkender ıis tııý belgilerimen aýrýhanaǵa jetkizildi. TJD dereginshe, óńirde jyl saıyn ıis tıip kóz jumǵandar sany azaımaı tur.
