ShQO-da halyqtyq sport oıyndary máresine jetti

Jarystyń aqyrǵy kúni ulttyq sport ulyqtaldy. Qyz qýar, teńge ilý, aýdaryspaq, jorǵa jarys, qunan báıge, alaman, kókpar saıysy boıynsha úzdikter anyqtaldy. Jınalǵan jurt nazary 25 shaqyrymdyq alaman jarysy men kókpar oıynyna erekshe aýdy.

Kókpardan Óskemen qalasynyń komandasy birinshi orynnan kórindi. Ekinshi orynǵa Kókpekti aýdany kóterilse, úzdik úshtikti Tarbaǵataı túıindedi. 25 shaqyrymdyq alaman jarysta oblys ákimi Danıal Ahmetov taǵaıyndaǵan avtokólikke Aıagóz aýdanynyń shabandozy Eljan Erboluly ıe boldy. Shabandozdyń baǵyn asyrǵan sáıgúliktiń esimi - «Kógershin». Ekinshi orynǵa «Álimqasqa» atty tulpardy tizgindegen jarmalyq Baǵdáýlet Erbolov taban tirese, tarbaǵataılyq «Qyzylasyq» Darhan Ulaǵatty úshinshi orynnyń tuǵyryna shyǵardy.

«Bul dodada úzdik nátıje kórsetken qatysýshylardan komanda jasaqtalyp, Mańǵystaýda ótetin respýblıkalyq básekede aımaq namysyn qorǵamaq» - deıdi oblystyq dene shynyqtyrý jáne sport basqarmasynyń basshysy Asqar Mojanov.

Báseke qorytyndysy boıynsha, qalalar arasynda 375 upaımen Óskemen qalasynyń sportshylary top jardy. Ekinshi orynnan 339 upaı enshilegen Semeı qalasy kórinse, úshinshi orynǵa 159 upaımen Rıdder qalasy shyqty.

Aýdandar arasynda Tarbaǵataı aýdany quramasy 320 upaımen top bastady. Ekinshi oryndy 257 upaımen Ulan aýdanynyń komandasy ıelense, 248,5 upaı jınaǵan Abaı aýdany úzdik úshtikte.

 
 

Saıys kestesi boıynsha jalpykomandalyq esepte komandalar tómendegideı ornalasty:

Qalalar arasynda jalpykomandalyq nátıje:

1 oryn - Óskemen (375 upaı)

2 oryn - Semeı (320 upaı)

3 oryn - Rıdder (159 upaı)

4 oryn - Zyrıan (126 upaı)

5 oryn - Kýrchatov (55 upaı)

Aýdandar arasynda jalpykomandalyq nátıje:

1 oryn - Tarbaǵataı aýdany (320 upaı)

2 oryn - Ulan aýdany (257 upaı)

3 oryn - Abaı aýdany (248,5 upaı)

4 oryn - Kúrshim aýdany (241 upaı)

5 oryn - Jarma aýdany (211upaı)

6 oryn - Zaısan aýdany (207 upaı)

7 oryn - Shemonaıha aýdany (201 upaı)

8 oryn - Glýbokoe aýdany (199 upaı)

9 oryn - Úrjar aýdany (188 upaı)

10 oryn - Aıagóz aýdany (183 upaı)

11 oryn - Borodýlıha aýdany (136 upaı)

12 oryn - Kókpekti aýdany (130 upaı)

13 oryn - Katonqaraǵaı aýdany (116,5 upaı)

14 oryn - Besqaraǵaı aýdany (109,5 upaı).