ShQO-da Halyq qaharmany Ǵazız Baıtasovty eske alý sharasy ótti
ÓSKEMEN. QazAqparat – Shyǵys Qazaqstan oblysynda Halyq qaharmany Ǵazız Baıtasovty eske alý sharasy ótti, dep habarlaıdy QazAqparat tilshisi.
2011 jyldyń 12 qarashasynda Taraz qalasynda terrorlyq shabýyl jasalǵan. Sol kezde 7 adam, onyń ishinde quqyq qorǵaý organdarynyń 5 qyzmetkeri qaza tapty. Bir saǵat ishinde qarý-jaraq asynǵan radıkal Maqsat Kárimov qala kóshelerinde júrip, jolyqqan árbir polıtseıge oq atqan.
Osy ýaqytta oqıǵa ornyna Jambyl oblysy ІІD Jol polıtsııasy jeke batalonynyń 1-shi vzvodynyń komandıri Ǵazız Baıtasov jetken. Kólikten júgirip shyqqan ol qaskóıge qarsy oq ata bastady. Osy ýaqytta qarsylas keıin sheginip, Ǵazızdiń keýdesine oq atqan. Qaýiptiń jaqyndaǵanyn túsingen polıtseı, radıkalda granata baryn bilip, aýyr jaraqatyna qaramastan ony jerge qulatady. Qylmyskerdi qolymen qysyp ustap, jarylǵan granatany denesimen qalqalaǵan.
«Búgin jas polıtseılerge 10 jyl buryn qaza tapqan Ǵazız Baıtasovty eske alýǵa arnalǵan erlik sabaǵy ótti. Batyrdyń erligi Shyǵys Qazaqstan oblysy Polıtsııa departamentiniń árbir qyzmetkeriniń júreginde máńgi saqtalady. Sebebi ol patrıotızmniń shynaıy úlgisi», - dep habarlady oblystyq PD baspasóz qyzmeti.
Sondaı-aq ShQO boıynsha QAJD qyzmetkerleri Ǵazız Baıtasovty eske alyp, bir mınýttyq únsizdik jarııalady.
«Halyq Qaharmany Ǵazız Baıtasov qyzmettik babynda júrip, qyryq jasynda ómirimen qoshtasty. Quqyq qorǵaý organynda qanshama qyzmetker qabyldaǵan antyn oryndaý barysynda, azamattardy qutqarý jolynda jáne beıbitshilik pen tynyshtyq úshin óz ómirlerin qurban etken. Olardyń árqaısysy búgingi urpaq júreginde», - dedi departament bastyǵynyń orynbasary Ǵalymjan Baltabaev.
